“Industria osoa, hemen” lelopean, + INDUSTRYk hirugarren edizioa egingo du ekainaren 3tik 5era bitarte Bilbao Exhibition Centren. Hain zuzen ere, Estatu mailako urteko topaketa industrial nagusia izango da. Zeharkako ekimen horrek fabrikazio aurreratuaren arloko protagonistak bilduko ditu sinergia estrategikoak sortzera, negozio-aukerak sustatzera eta berrikuntza eta ezagutza bultzatzera bideratutako ingurune dinamikoan. Ildo berean, eta denetik izango duen erakusketa guneaz gain, +INDUSTRYk konferentzien helburu handiko programa eskainiko du, industriaren sektorea berriro definitzen ari diren erronka eta joera nagusiak sakontzeko. Programak 40 hizlari izango ditu guztira, Espainia, Alemania, Belgika, Frantzia, Suedia eta Herbehereetatik etorriak, eta horrek nazioarteko eta diziplina anitzeko ikuspegia emango dio topaketari.

Hiru egunez, programak industriaren orainaldiari eta etorkizunari buruzko funtsezko edukiak landuko ditu horretarako prestatutako saio espezializatuen bidez. Ekainaren 3an, Digital Talks izenekoak egingo dira. Jardunaldi horretan, gai estrategikoak landuko dira: Europar Batasuneko Adimen Artifizialaren Lege berria, zibersegurtasunaren integrazioa ingurune industrialetan eta cloud compuntingerako eta adimen artifizialerako Europako esparrua, besteak beste. Hain zuzen ere, ezinbesteko gaiak dira sektorearen bilakaera erabakiko duten araudi eta teknologia mailako aldaketei aurrea hartu nahi dien enpresentzat.

Ekainaren 4an, Maintenance Talksen txanda izango da eta mantentze prediktiboan adimen artifiziala aplikatzea, prozesuen automatizazioa, berrikuntza zailtzen duten oztopoak eta egungo industrian mantentze-lanek sortu dituzten erronka nagusiak izango dituzte hizpide. Nazioartean ospe handia duten adituek beren ezagutzak partekatuko dituzte mantentze industrialaren etorkizunari buruzko ikuspegi argia eskaintzeko.

Konferentzien zikloa amaitzeko, ekainaren 5ean, fabrikazio aditiboko punta-puntako aurrerapenei buruzko Additive Talks hitzaldiak egingo dira. Jardunaldi horretan, besteak beste, metal haridunarekin egindako zuzeneko jalkitzearen teknologia berriekin, SLM teknologiako berrikuntzekin edo prozesatu osteko aurrerapenekin lotutako abangoardiako gaiak jorratuko dira. Ezinbesteko hitzordua da teknologia aurreratuenak fabrikazio modernoaren mugak nola zabaltzen ari diren gertutik ezagutzeko.

Balio erantsi gisa, Innovation Workshop tailerrek ezagutzarako eta konexiorako espazioa eskainiko dute, teknologiarik berritzaileenetan sakontzeko. Berrogeita hamar aurkezpen baino gehiago emango dira, benetako kasu aplikagarrietara bideratuta, eta enpresa erakusketariek eta babesleek beren esperientzia partekatuko dute garrantzi handiko hainbat arlotan, hala nola prozesu operazionalen digitalizazioan, AArekin egindako plangintza aurreratuan, 4.0 mantentze-lanetan, produkzioan sekuentzia optimizatzeko lanean, balbulen zarataren kudeaketan, intralogistikako automatizazioari aplikatutako robotika mugikorrean eta roboten eta pertsonen koordinazioan eta integrazioan, besteak beste.

Gainera, lankidetza-inguruneetan fabrikazio adimenduneko teknologiei buruzko jardunaldia ere egingo da. Bertan, konektatutako industrian produzitzeko modua birdefinitzen ari diren irtenbide aurreratuak jorratuko dira. Bestalde, Tech Demos guneetan, berriz, zuzeneko erakustaldi teknikoak egingo dira, eta enpresa erakusketariek beren produktuak erakutsiko dituzte, benetako industria-inguruneetan azken berrikuntzak nola aplikatzen diren zuzenean jakiteko aukera paregabea eskainiz.